មនុស្ស​ជោគជ័យ​ត្រូវ​ជម្នះ​រឿង​ទាំង៥នេះ

មនុស្សជោគជ័យដោះស្រាយបញ្ហាក្នុងរបៀបខុសពីមនុស្សទូទៅ គឺនៅពេលមនុស្សទូទៅមើលឃើញឧបសគ្គ មនុស្សជោគជ័យមើលឃើញរឿងដែលត្រូវជម្នះ។ ការរក្សាផ្នត់គំនិតជោគជ័យមិនមែនជារឿងងាយស្រួលទេ មានរឿង៧ដែលច្រើនតែចូលមកបំផ្លាញផ្នត់គំនិតនេះ ហើយអ្នកត្រូវតែជម្នះឱ្យបាន៖

១/ អាយុ

អាយុគ្រាន់តែជាតួលេខទេ។ មនុស្សជោគជ័យមិនបណ្តោយឱ្យអាយុធ្វើជាកត្តាកំណត់អត្តសញ្ញាណ និងសមត្ថភាពរបស់គេទេ។ មនុស្សភាគច្រើនវាយតម្លៃអ្នកដទៃតាមរយៈសំបកក្រៅ គឺគេគិតថាវ័យនេះគួរតែធ្វើកិច្ចការនេះបាន ហើយវ័យនេះមិនអាចធ្វើកិច្ចការនេះបានជាដើម។ កុំស្តាប់មនុស្សទាំងនេះ តែត្រូវស្តាប់បេះដូងរបស់អ្នកវិញ និងដើរតាមឆន្ទៈរបស់ខ្លួនឯង។

២/ ការគិតរបស់អ្នកដទៃ

នៅពេលអ្នកវាស់ស្ទង់កម្រិតជោគជ័យរបស់អ្នកជាមួយនឹងអ្នកដទៃ អ្នកលែងជាម្ចាស់ការលើជោគវាសនារបស់ខ្លួនឯងទៀតហើយ។ ទោះបីជាអ្នកមិនអាចហាមឃាត់ប្រតិកម្មរបស់អ្នកចំពោះការគិតរបស់អ្នកដទៃ ក៏អ្នកមិនត្រូវយកសមិទ្ធផលរបស់ខ្លួនឯងទៅវាស់ស្ទង់តាមគំនិតអ្នកដទៃដែរ។ ទោះជាអ្នកដទៃនិយាយ ឬធ្វើអ្វីចំពោះអ្នក ក៏តម្លៃពិតប្រាកដរបស់អ្នកនៅតែកើតចេញពីខាងក្នុងខ្លួនអ្នកដែរ។ មនុស្សជោគជ័យដឹងច្បាស់ថាការយកចិត្តទុកដាក់ចំពោះពាក្យសម្តីរបស់អ្នកដទៃជាការខ្ជះខ្ជាយពេលវេលា។

៣/ មនុស្សបំពុល

មនុស្សជោគជ័យប្រកាន់ខ្ជាប់សុភាពសិតមួយឃ្លាគឺការសេពគប់ជារឿងសំខាន់។ សាកសម្លឹកមើលសាវតាក្រុមហ៊ុនជោគជ័យបំផុតក្នុងប្រវត្តិសាស្រ្តថ្មីៗនេះ អ្នកនឹកឃើញថាក្រុមហ៊ុនទាំងនោះបង្កើតឡើងដោយមនុស្សពីរនាក់ដែលមានចំណេះដឹងនិងឆន្ទៈប្រហាក់ប្រហែលគ្នា។ ជាក់ស្តែង លោកSteve Jobs និងលោកSteve Wozniak​ នៃក្រុមហ៊ុនApple ​រស់នៅក្បែរគ្នា លោកBill Gates និងលោក Paul Allen នៃក្រុមហ៊ុនMicrosoft រៀននៅសាលាជាមួយគ្នា លោកSergey Brin និងលោកLarry Page នៃក្រុមហ៊ុនGoogle ក៏រៀននៅសាលាជាមួយគ្នាដែរ។ រាប់អានជាមួយមនុស្សអស្ចារ្យនឹងជួយរុញច្រានអ្នកឱ្យសម្រេចបានសក្តានុពលរបស់អ្នក តែបើរាប់អានជាមួយមនុស្សបំពុល គេក៏នឹងទាញទម្លាក់អ្នកទៅក្នុងផ្លូវខុសដែរ។

៤/ ការភ័យខ្លាច

ការភ័យខ្លាចគ្មានអ្វីក្រៅពីអារម្មណ៍របស់អ្នកដែលបង្កើតឡើងដោយការស្រមើស្រមៃរបស់អ្នកទេ។ គ្រោះថ្នាក់មានពិត តែការភ័យខ្លាចគឺជាជម្រើសប៉ុណ្ណោះ។ មនុស្សជោគជ័យស្គាល់អាថ៌កំបាំងនេះ ហើយគេបង្វែរការភ័យខ្លាចទៅជាឈ្នាន់សម្រាប់ឈានទៅរកទីកាន់តែខ្ពស់។ កុំរុញរាក្នុងជីវិតដោយសារតែអ្នកមានអារម្មណ៍ភ័យខ្លាច។ តើមានរឿងអ្វីដែលអាក្រក់បំផុតក្នុងជីវិតមនុស្សម្នាក់ៗ? តើរឿងនោះអាចសម្លាប់ជីវិតអ្នកបានទេ? ការស្លាប់មិនមែនជារឿងអាក្រក់ទេ ប៉ុន្តែការដែលអ្នកបណ្តោយឱ្យខ្លួនឯងស្លាប់ទាំងនៅមានជីវិតគឺជារឿងដែលអាក្រក់បំផុត។

៥/ អតីតកាល ឬអនាគត

ស្រដៀងគ្នានឹងការភ័យខ្លាចដែរ អតីតកាលនិងអនាគតកើតចេញពីចិត្តរបស់អ្នក។ ទោះជាអ្នកសោយសោកដល់ណា ក៏អ្នកមិនអាចកែប្រែអតីតកាលបានដែរ ហើយទោះជាអ្នកបារម្ភ ឬអន្ទះសារយ៉ាងណាក៏នៅតែមិនអាចកែប្រែអនាគតបានដែរ។ មនុស្សជោគជ័យផ្តោតចិត្តរស់តែក្នុងពេលបច្ចុប្បន្នប៉ុណ្ណោះ។ អ្នកមិនអាចសម្រេចសក្តានុពលពេញលេញបានទេ បើអ្នករវល់តែរស់នៅក្នុងអតីតកាល ឬអនាគតកាល ហើយមិនអាចទទួលយកការពិតទាំងល្អ ទាំងអាក្រក់ដែលកំពុងតែកើតឡើងចំពោះអ្នក។ ដើម្បីរស់នៅក្នុងពេលបច្ចុប្បន្នឱ្យបានពេញលេញ អ្នកត្រូវតែទទួលយកអតីតកាល និងព្រមទទួលយកភាពមិនជាក់លាក់នៃអនាគត។

ប្រែសម្រួល​៖ ស៊ីនកែវ

ប្រភព​៖ Success Magazine

Read More

ទម្លាប់​ប្រចាំថ្ងៃ​របស់មនុស្ស​ជោគជ័យ​ខ្លាំង

ក្នុងនាមជាម្ចាស់នៃជោគវាសនារបស់ខ្លួនឯង មនុស្សយើងជាម្ចាស់នៃទម្លាប់ផ្ទាល់ខ្លួនរបស់យើង។

មនុស្សយើងជាសត្វនៃទម្លាប់។ បើនរណាម្នាក់មានទម្លាប់អាក្រក់ មិនមែនមាន័យថាទម្លាប់នោះអាក្រក់ចេញមកពីកំណើតរបស់មនុស្សនោះទេ។ មនុស្សជោគជ័យបំផុតក្នុងភពផែនដីនេះសុទ្ធតែបង្កើតទម្លាប់ប្រចាំខ្លួនដើម្បីបញ្ជៀស ឬរារាំងទម្លាប់អាក្រក់ដែលបំផ្លាញដល់ដំណើរជោគជ័យរបស់គេ។

ការកំណត់វិន័យ ឬទម្លាប់ទៀងទាត់សម្រាប់ខ្លួនឯងជារឿងមិនងាយស្រួលដូចការនិយាយទេ។ លោកBenjamin Franklin បង្កើតទម្លាប់ក្រោកនៅម៉ោង៥ព្រឹករាល់ថ្ងៃ ហើយដាក់ឈ្មោះឱ្យម៉ោងនីមួយៗរបស់គាត់ដើម្បីប្រើប្រាស់ពេលវេលាឱ្យមានប្រសិទ្ធភាពបំផុត។ លោក Mark Zuckerberg កាត់បន្ថយសម្រេចចិត្តប្រចាំថ្ងៃតាមរយៈការពាក់អាវយឺតដូចគ្នារាល់ថ្ងៃ។ តើអ្នកបង្កើតទម្លាប់ល្អបានដូចម្តេច? ពិនិត្យមើលគំរូខាងក្រោមនេះរបស់មនុស្សជោគជ័យទាំងក្នុងអតីតកាលនិងក្នុងពេលបច្ចុប្បន្ន​ រួចជ្រើសរើសទម្លាប់ណាមួយដែលត្រូវនឹងចរិតរបស់អ្នក៖

១/ រក្សាវិន័យឱ្យបានតឹងរឹង

លោកBenjamin Franklin កំណត់ពេលវេលាប្រចាំថ្ងៃយ៉ាងជាក់លាក់ ហើយសួរខ្លួនឯងមួយថ្ងៃពីរដឹងគឺពេលព្រឹកសួរថាតើខ្ញុំនឹងធ្វើកិច្ចការល្អអ្វីខ្លះនៅថ្ងៃនេះ? ហើយពេលព្រលមមុនចូលគេងសួរសំណួរបញ្ជាក់មួយទៀតថាតើថ្ងៃនេះខ្ញុំបានធ្វើអ្វីល្អខ្លះ?

លោក Mark Zuckerberg ព្យាយាមកាត់បន្ថយជម្រើសប្រចាំថ្ងៃតាមរយៈការស្លៀកពាក់ខោអាវដូចគ្នារាល់ថ្ងៃដើម្បីយកពេលទៅគិតរឿងច្នៃប្រឌិតផ្សេងៗដែលមានប្រយោជន៍និងសំខាន់ជាងរឿងស្លៀកពាក់។

លោកElon Musk មានទម្លាប់បែងចែកពេលវេលាធ្វើការសម្រាប់ក្រុមហ៊ុនទាំងពីររបស់លោកយ៉ាងច្បាស់លាស់ គឺថ្ងៃចន្ទនិងថ្ងៃព្រហស្បតិ៍ធ្វើការតែសម្រាប់ក្រុមហ៊ុនSpaceX ថ្ងៃអង្គារនិងថ្ងៃពុធធ្វើតែការងារក្រុមហ៊ុនTesla ហើយថ្ងៃសុក្រធ្វើការទាំងពីរក្រុមហ៊ុន។

២/ បង្កើនចំណេះដឹងរាល់ថ្ងៃ

លោកWarren Buffett ចំណាយពេល៨០ភាគរយក្នុងមួយថ្ងៃដើម្បីអានសៀវភៅ។ រៀងរាល់ថ្ងៃលោកអានសៀវភៅប្រហែល៦០០ទៅ១០០០ទំព័រដើម្បីទទួលបានគំនិតថ្មីៗ និងចំណេះដឹងទូលំទូលាយ។

លោកBill Gates អានសៀវភៅមួយម៉ោងមុនពេលចូលគេងរាល់យប់។ យ៉ាងហោចណាស់លោកអានសៀវភៅមួយក្បាលក្នុងមួយសប្តាហ៍ ហើយរៀងរាល់ឆ្នាំលោកចែករំលែកគំនិតពីសៀវភៅដែលលោកបានអាន។

លោកស្រីOprah Winfrey ចាប់ផ្តើមអានសៀវភៅតាំងពីអាយុ៣ឆ្នាំ ហើយរហូតមកដល់សព្វថ្ងៃនៅតែមានទម្លាប់អានសៀវភៅរាល់ថ្ងៃ។ ក្រៅពីការងារផលិតកម្មវិធីទូរទស្សន៍លោកស្រីបង្កើតក្រុមអ្នកអានដែលណែនាំសៀវភៅល្អៗដល់មនុស្សទូទៅ។

៣/ ហាត់ប្រាណរាល់ថ្ងៃ

លោកRichard Branson ក្រោកពីដំណេកនៅម៉ោង៥ព្រឹក ដើម្បីលេងវាយសី ហែលទឹក ឬជិះក្តោងលើទឹក។ លោកអះអាងថាការហាត់ប្រាណទាំងនេះជួយបង្កើនពេលវេលានៃប្រសិទ្ធភាពការងារប្រចាំថ្ងៃបាន៤ម៉ោងក្នុងមួយថ្ងៃ។

លោកស្រីTyra Banks ជាអតីតតារាបង្ហាញម៉ូដ តារាសម្តែង និងជាអ្នកនិពន្ធសៀវភៅណែនាំឱ្យមនុស្សគ្រប់គ្នាហាត់ប្រាណដើម្បីសុខភាព និងភាពស្វាហាប់ក្នុងការងារប្រចាំថ្ងៃ។

លោកMark Cuban លេងបាល់ និងហាត់វាយបុក ធ្វើកីឡាផ្សេងៗមួយម៉ោងរាល់ថ្ងៃដើម្បីរុញច្រានព្រំដែននៃការគិតនិងសកម្មភាពប្រចាំថ្ងៃរបស់លោកដែលធ្វើឱ្យលោកមានលុយជាង៣ពាន់លានដុល្លារដូចសព្វថ្ងៃ។

៤/ បណ្តុះនិងរក្សាផ្នត់គំនិតល្អៗ

លោកSteve Jobs តែងតែរំលឹកសួរខ្លួនឯងរាល់ថ្ងៃថាបើថ្ងៃនេះជាថ្ងៃចុងក្រោយនៃជីវិតរបស់ខ្ញុំ តើខ្ញុំរីករាយនឹងកិច្ចការដែលខ្ញុំប្រុងធ្វើនៅថ្ងៃនេះទេ?​ បើចម្លើយអវិជ្ជមានច្រើនដង មានន័យថាមានអ្វីមួយខុសប្រក្រតីហើយ។

លោកស្រីSheryl Sandberg ជាមនុស្សសំខាន់ទីពីរនៅក្រុមហ៊ុនFacebook ប្រកាន់ទស្សនៈថាយើងទាញទម្លាក់ខ្លួនឯងទោះជាក្នុងកិច្ចការធំ ឬកិច្ចការតូចក៏ដោយ តាមរយៈការខ្វះជំនឿចិត្តលើខ្លួនឯង និងមិនចេះបញ្ចេញមតិយោបល់នៅពេលមានគំនិតអ្វីមួយ។

លោកThomas Edison ត្រូវគេស្គាល់ថាជាអ្នកច្នៃប្រឌិតដ៏អស្ចារ្យមួយរូប។ លោករៀនពីកំហុសនិងបរាជ័យ ហើយរុញច្រានព្រំដែននៃការច្នៃប្រឌិតរហូតរកឃើញដំណោះស្រាយ។

ប្រែសម្រួល​៖ ស៊ីនកែវ

ប្រភព​៖ Success Magazine

Read More

ជំនាញ​ដែល​ពិបាក​រៀន​តែ​មាន​ប្រយោជន៍​ច្រើន

ពេលវេលាដែលអ្នករស់នៅមានដែនកំណត់ ដូច្នេះអ្នកគួរតែប្តេជ្ញាចិត្តរៀនជំនាញដែលផ្តល់ប្រយោជន៍ច្រើននិងយូរអង្វែង ហើយជំនាញទាំងនេះអាចរៀននៅក្នុងសាលាក៏បាន និងក្រៅសាលាក៏បាន។

១/ ជំនាញដឹងថាពេលណាមិនត្រូវនិយាយ

ធម្មជាតិរបស់មនុស្សតែងតែចង់បង្ហាញគេថាខ្លួនឯងត្រូវគ្រប់ពេល ប៉ុន្តែនេះមិនមែនជាទម្លាប់ល្អទេ។ នៅក្នុងស្ថានភាពខ្វែងគំនិតគ្នា អារម្មណ៍ដែលមិនបានពិនិត្យច្បាស់លាស់នឹងរុញច្រានអ្នកឱ្យធ្លាក់ចូលក្នុងរណ្តៅនៃការប្រយុទ្ធរកទីបំផុតគ្មាន។ បើអ្នកស្គាល់អារម្មណ៍ខ្លួនឯងច្បាស់ អ្នកអាចដឹងថាពេលណាត្រូវនិយាយហេតុផល និងពេលណាដែលត្រូវស្តាប់គេនិយាយវិញម្តង។ ក្នុងការពេលប្រកែកគ្នា រឿងដែលពិបាកធ្វើបំផុតគឺការបិទមាត់។

២/ ជំនាញគ្រប់គ្រងពេលវេលា

បញ្ហាធំបំផុតមួយដែលតែងតែចូលមកបំផ្លាញការគ្រប់គ្រងពេលវេលាឱ្យមានប្រសិទ្ធភាពគឺភាពបន្ទាន់។ បញ្ហាបន្ទាន់ច្រើនតែជាកិច្ចការកំប៉ិកំប៉ុកដែលចូលមករំខានអារម្មណ៍របស់អ្នកឱ្យគិតថាវាជារឿងដែលត្រូវធ្វើឱ្យហើយក្នុងពេលនេះ។ បើអ្នកបង្វែរអារម្មណ៍ពីកិច្ចការសំខាន់ទៅធ្វើការងារបន្ទាន់ទាំងនេះ អ្នកនឹងធ្លាក់ក្នុងរង្វង់នៃការងារមិនច្បាស់លាស់ដែលខាតពេលវេលាយ៉ាងច្រើន។

៣/ ជំនាញស្តាប់

មនុស្សជាច្រើនគិតថានេះជាជំនាញងាយស្រួលបំផុត គឺបើយើងមិននិយាយ មានន័យថាយើងកំពុងតែស្តាប់។ ការពិតមិនមែនបែបនេះទេ ភាគច្រើនយើងគិតថាយើងកំពុងតែស្តាប់ ប៉ុន្តែការពិតយើងកំពុងតែនឹកគិតរកចំណុច ឬពាក្យនិយាយឆ្លើយតបទៅមនុស្សដែលកំពុងតែនិយាយមករកយើង។ គោលដៅនៃការស្តាប់គឺដើម្បីយល់ មិនមែនគ្រាន់តែបិទមាត់នោះទេ។ ការរៀនពន្យាពេលវាយតម្លៃ និងផ្តោតចិត្តលើការយល់អ្នកដទៃឱ្យបានច្បាស់គឺជាជំនាញសំខាន់បំផុតមួយដែលអ្នកត្រូវចេះក្នុងជីវិត។ ការស្តាប់ពិតប្រាកដមិនមែនស្តាប់ត្រឹមតែពាក្យទេ​ គឺត្រូវសង្កេតទឹកមុខ មើលកាយវិការថែមទៀត។

៤/ ជំនាញក្នុងការបដិសេធ

ការសិក្សាស្រាវជ្រាវនៅសកលវិទ្យាល័យCalifornia រកឃើញថាបើអ្នកពិបាកនិយាយបដិសេធ អ្នកនឹងជួបបញ្ហាតានតឹងអារម្មណ៍ និងបញ្ហាផ្លូវចិត្តជាច្រើនទៀត។ ការនិយាយបដិសេធជារឿងដែលពិបាកធ្វើបំផុតសម្រាប់មនុស្សភាគច្រើន។ ដើម្បីមានភាពក្លាហានក្នុងការនិយាយបដិសេធ អ្នកត្រូវស្គាល់អាទិភាពសម្រាប់ខ្លួនឯងឱ្យបានច្បាស់ និងមិនត្រូវខ្លាចប៉ះពាល់អារម្មណ៍អ្នកដទៃឡើយ។ កុំយល់ព្រមទទួលធ្វើកិច្ចការដែលធ្វើឱ្យអ្នកស្តាកក្រោយ តែត្រូវហ៊ាននិយាយបដិសេធភ្លាមៗ។

៥/ ជំនាញគេងឱ្យបានគ្រប់គ្រាន់

យើងដឹងច្បាស់ថាការគេងបានគ្រប់គ្រាន់ជួយដល់ដំណើរការខួរក្បាល។ ការសិក្សាថ្មីៗនេះនៅសកលវិទ្យាល័យ Rochester បង្ហាញថានៅពេលយើងគេង ខួរក្បាលរបស់យើងបញ្ចេញសារធាតុពុល។ ប៉ុន្តែខួរក្បាលមនុស្សយើងអាចបញ្ចេញសារធាតុពុលទាំងនេះតែនៅពេលណាដែលយើងគេងបានស្កប់ស្កល់ប៉ុណ្ណោះ។ បើគេងមិនបានគ្រប់គ្រាន់តែ ខួរក្បាលរបស់យើងក៏នៅតែរក្សាសារធាតុពុលទាំងនោះកាន់តែច្រើនដែលរំខានដល់ការគិត និងបណ្តាលឱ្យឈឺក្បាល ឬអារម្មណ៍មិននឹងធឹងទៀតផង។ ដើម្បីគេងបានគ្រប់គ្រាន់ អ្នកមិនត្រូវទុកទូរសព្ទនៅក្បែរខ្លួន ហើយត្រូវឈប់គិតអ្វីទាំងអស់ពេលគេង។

ប្រែសម្រួល​៖ ស៊ីនកែវ

ប្រភព​៖ Forbes

Read More

ដំណឹងបាត់ម៉ូតូ

បើសិនបងប្អូនឃើញម៉ូតូដែលមានស្លាកលេខ 1GI-5733 ម៉ាកស្កូបពីអាយ សេរ៊ី2012 ពណ៌ក្រហម សូមផ្តល់ដំណឹងមកលេខ ទូរសព្ទ 078558815 យើងខ្ញុំនឹងមានជូនជាសាគុណ។ បានបាត់នៅចន្លោះម៉ោង ប្រហែលជា១០:៣០នាទី ដល់ ១១:០០ យប់ ថ្ងៃទី ១០ ខែ ឧសភា ឆ្នាំ ២០១៧ ។ នៅចំណុច ម្តុំវត្តសំរោងអណ្តែត ។

#បងប្អូនជួយមើលផង 😞😞

Read More

ធ្វើ​ការ​វះ​កាត់​ខួរ​ក្បាល ដោយ​មាន​ជំនួយ​​ពី​មនុស្ស​យន្ត​​

ក្រុម​វេជ្ជបណ្ឌិត​នៅ​ឯមន្ទីរ​ពេទ្យ ​ Bangkok's Ramathibodi បាន​ធ្វើការ​វះ​កាត់ខួរ​ក្បាល​អោយអ្នក​ជំងឺជា​លើក​ដំបូង​​ដោយ​មាន​ជំនួយ​ពី​មនុស្សយន្ត​ ការ​វះកាត់​នេះធ្វើ​ឡើងដោយ​ជោគ​ជ័យ​​ទៅ​លើ​អ្នក​ជំងឺ​ភេទ​ប្រុស អាយុ​៧៧ឆ្នាំម្នាក់ ដែល​មាន​ជំងឺ​មហា​រីក​ខួរ​ក្បាល កាល​ពី​ថ្ងៃ​ចន្ទ ដើម​សប្តាហ៍​កន្លង​ទៅ​នេះ​។

Brain surgery
លោក​វេជ្ជបណ្ឌិត Piyamitr Sritara លើក​ឡើង​ថា ការ​វះ​កាត់​តាម​បែប​​បច្ចេកវិជ្ជា​ថ្មីនេះ ​មាន​តម្លៃ​ថ្លៃ​ជាងប្រមាណ ១សែន បាត បើ​ប្រៀប​ធៀប​ទៅ​នឹង​​ការ​វះ​កាត់​តាម​បែប​ធម្មតា​ នេះ​មិន​ទាន់​គិត​អំពី​ថ្លៃ​សេវា​វេជ្ជ​សាស្រ្ត​ផ្សេង​ៗ​នៅ​ឡើយ​។ ដោយ​ឡែក លោក​វេជ្ជបណ្ឌិត Wachira Kochakarn ប្រធាន​ផ្នែក​វះកាត់​នៃ​មន្ទីរ​ពេទ្យ​ Bangkok's Ramathibodi បាន​បញ្ជាក់ថា​ មន្ទីរ​ពេទ្យ​អាច​ពិចារណា​ក្នុង​ការ​ប្រើ​ប្រាស់​មូលនិធិ​របស់​មន្ទីរ​ពេទ្យ ដើម្បី​ចំណាយ​លើ​​ថ្លៃ​វះ​កាត់​តាម​បែប​បច្ចេកវិជ្ជា​ថ្មី​នេះ ជូន​ដល់​អ្នក​ជំ​ងឺ ប្រសិន​ជា​អ្នក​ជំងឺ​ពុំ​មាន​លទ្ធភាព​​ចេញ​ថ្លៃ​វះ​កាត់​។

លោក​វេជ្ជ​បណ្ឌិត Sorayouth Chumnanvej ឯកទេស​ផ្នែក​វះ​កាត់​ បាន​អះ​អាង​ថា មុខ​របួស​ដែល​ធ្វើ​ការ​វះ​កាត់​តាម​បែប​បច្ចេកវិជ្ជា​ថ្មី​នេះ គឺ​តូច​ជាងមុខ​របួស​ដែល​វះ​កាត់​តាម​បែប​ធម្មតា​ រហូត​ដល់​ទៅ​៣​ដង និងជួយ​កាត់​បន្ថយ​ពេល​វេលា​នៃ​ការ​វះ​កាត់​ ព្រម​ទាំង​​​អាច​ជួយ​ក្នុង​ការ​ទប់​ស្កាត់​ការ​ឆ្លង​នៃ​មេ​រោគ​ផ្សេងៗ​ផង​ដែរ​។

គួរ​បញ្ជាក់ថា​ ​បច្ចេកវិជ្ជា​វះ​កាត់​ខួរ​ក្បាល​មាន​ជំនួយ​ពី​មនុស្ស​យន្ត​នេះ មាន​តម្លៃ​រហូត​ដល់​ ៤០ លាន​ បាត ហើយ​នៅក្នុង​តំបន់​អាស៊ី​អាគ្នេយ៍បច្ចុប្បន្ន​នេះ​ មាន​តែ​ប្រទេស​ថៃ និង ប្រទេសវៀតណាម​ ប៉ុណ្ណោះ​ដែល​មាន​​បច្ចេកវិជ្ជា​វិជ្ជសាស្រ្ត​នេះ​៕

ប្រែ​សម្រួល​៖ ស៊ីនកែវ

ប្រភព៖ asiaone

Read More

​កំពូល​និស្សិត​​ដែល​បាន​​បោះបង់​ការសិក្សា​​ហើយ​បាន​​ក្លាយជា​ កំពូល​​​មហាសេដ្ឋី ទាំង១០

អ្នកមានទ្រព្យសម្បត្តិនិងសហគ្រិនដែលមានឥទ្ធិពលបំផុតមួយចំនួននៅក្នុងពិភពលោកនេះរៀនមិនចប់មហាវិទ្យាល័យទេ។ ជាក់ស្តែង លោក Steve Jobs, Bill Gates និង Mark Zuckerberg ជាដើមសុទ្ធតែឈប់រៀនមុនពេលបានទទួលសញ្ញាបត្រ។ លោក Peter Thiel ថែមទាំងលើកទឹកចិត្តនិស្សិតដែលមានទេពកោសល្យឱ្យឈប់រៀនតាមរយៈការផ្គត់ផ្គង់អាហារូបករណ៍ដែលជូនរង្វាន់ជាទឹកប្រាក់ចំនួន១០០,០០០ដុល្លារប្រសិនបើមាននិស្សិតឆ្នើមណាឈប់រៀន។ បុគ្គលដែលមានទ្រព្យច្រើននិងមានគេស្គាល់ច្រើនទាំង១០នាក់នេះសុទ្ធតែបោះបង់ការសិក្សាទៅធ្វើកិច្ចការដែលគេចង់ធ្វើ៖

១/ Michael Dell

លោក Michael Dell ឈប់រៀននៅសកលវិទ្យាល័យ Texas ក្នុងឆ្នាំដំបូង នៅវ័យ១៩ឆ្នាំដើម្បីទៅបង្កើតក្រុមហ៊ុនបច្ចេកវិទ្យា ហើយពេលនេះក្រុមហ៊ុនរបស់លោកមានតម្លៃ២០.៩ពាន់លានដុល្លារ។

២/ Steve Jobs

ស្ថាបនិកក្រុមហ៊ុនApple ឈប់រៀនពីមហាវិទ្យាReed នៅពេលមានអាយុ១៩ឆ្នាំ ដោយសារគ្រួសារពិបាករកលុយផ្គត់ផ្គង់ពេក។ ទោះបីជារៀនមិនចប់មែន តែលោកSteve Jobs ទទួលបានចំណេះដឹងមូលដ្ឋានសំខាន់មួយពីមហាវិទ្យាល័យនោះដែរធ្វើឱ្យលោកយកទៅប្រើប្រាស់ក្នុងកុំព្យូទីមួយរបស់លោក។

៣/ Julian Assange

មុនពេលក្លាយជាអ្នកលួចយកឯកសារតាមកុំព្យូទ័រដ៏ល្បី លោកJulian Assange សិក្សាគណិតវិទ្យានៅសកលវិទ្យាល័យ Melbourne។ ស្ថាបនិកគេហទំព័រ WikiLeaks រូបនេះបង្ហាញគំនិតប្រឆាំងនឹងរដ្ឋាភិបាលនៅពេលលោកឈប់រៀនក្នុងវ័យ១៩ឆ្នាំ ដោយសារគេហាមមិនឱ្យនិស្សិតធ្វើការក្នុងគម្រោងកុំព្យូទ័រសម្រាប់យោធាអូស្រ្តាលី។

៤/ Bill Gates

លោកBill Gates រៀននៅសកលវិទ្យាល័យHarvard បានពីរឆ្នាំមុនពេលឈប់ទៅបង្កើតក្រុមហ៊ុនMicrosoft។ សព្វថ្ងៃគេស្គាល់លោកBill Gates ច្បាស់ថាជានិស្សិតរៀនមិនចប់ដែលជោគជ័យបំផុតរបស់Harvard ហើយក៏ជាមនុស្សដែលមានជាងគេបំផុតលើផែនដីនេះដែរ។

៥/ Evan Williams

លោកEvan Williams ធំដឹងក្តីឡើងនៅភូមិតូចមួយនៃរដ្ឋ Nebraska ជាកន្លែងដែលគ្រួសារលោកធ្វើកសិដ្ឋាន។ លោកចូលរៀននៅសកលវិទ្យាល័យបាន៣ឆមាសមុនពេលឈប់។ លោក Williams ធ្វើការក្រៅម៉ោងឱ្យក្រុមហ៊ុន HP និង Intel មុនពេលធ្វើការពេញម៉ោងនៅក្រុមហ៊ុនGoogle ហើយក្រោយមកក៏ឈប់ធ្វើការឱ្យគេទៅបង្កើតTwitter និងក្លាយខ្លួនជាមហាសេដ្ឋីដល់សព្វថ្ងៃ។

៦/ Mark Zuckerberg

លោកMark Zuckerberg ឈប់រៀនពីHarvard ទៅបង្កើតក្រុមហ៊ុនFacebook និងក្លាយជាអ្នកមានលំដាប់ទី៥ក្នុងពិភពលោក។ នៅក្នុងសៀវភៅ"The Facebook Effect" លោកប្រើពេលតែ៥នាទីប៉ុណ្ណោះដើម្បីសម្រេចចិត្តឈប់រៀន។

៧/ Larry Ellison

សព្វថ្ងៃលោកLarry Ellison ត្រូវគេស្គាល់ថាជាមហាសេដ្ឋីនិងជាស្ថាបនិកក្រុមហ៊ុន Oracle។ ប៉ុន្តែ នៅពេលលោកធំដឹងក្តី ម្តាយឪពុកចិញ្ចឹមរបស់លោកចង់ឱ្យលោកក្លាយជាវេជ្ជបណ្ឌិត។ លោកបានចូលរៀននៅសកលវិទ្យាល័យ Illinois និងសកលវិទ្យាល័យ Chicago ប៉ុន្តែពិបាករៀនពេទ្យពេកក៏បោះបង់ការសិក្សាចោល។ សព្វថ្ងៃនេះលោកមានទ្រព្យសម្បត្តិប្រហែល៥៥ពាន់លានដុល្លារ។

៨/ Jan Koum

សហគ្រិនអន្តោប្រវេសន៍Jan Koum ព្យាយាមដើម្បីបានចូលរៀននៅមហាវិទ្យាល័យ ហើយក៏ឈប់រៀនវិញមុនពេលរៀនចប់។ លោកទៅធ្វើការឱ្យក្រុមហ៊ុនYahoo ហើយក្រោយមកក៏បង្កើតកម្មវិធីផ្ញើសារដ៏ពេញនិយមមួយគឺ WhatsApp។

៩/ Travis Kalanick

មុនពេលក្លាយជាCEO និងស្ថាបនិកក្រុមហ៊ុនUber លោកTravis Kalanick សិក្សាវិស្វកម្មកុំព្យូទ័រនៅសកលវិទ្យាល័យCalifornia។ លោក Kalanick សម្រេចចិត្តឈប់រៀនត្រឹមតែពីរបីខែមុនពេលរៀនចប់ ដើម្បីទៅបង្កើតកម្មវិធីស្វែងរកពត៌មាន Scour។

១០/ John Mackey

លោក John Mackey សិក្សាសាសនានិងទស្សនវិជ្ជានៅសកលវិទ្យាល័យ Texas មុនពេលសម្រេចចិត្តបោះបង់ចោលការសិក្សា ទៅខ្ចីលុយគេ៤៥,០០០ដុល្លារ ដើម្បីបើកហាងអាហារសុខភាពឈ្មោះSaferWay។ សព្វថ្ងៃហាងរបស់លោក Mackey បានប្រែក្លាយខ្លួនទៅជាហាង Whole Foods ដែលលក់គ្រឿងទេសសរីរាង្គដ៏ល្បីល្បាញមួយក្នុងពិភពលោក។

ប្រែសម្រួល​៖​ ស៊ីនកែវ

ប្រភព៖ CNBC

Read More

ខេមរៈ សិរីមន្ត គ្រោងបើកផលិតកម្មចម្រៀងផ្ទាល់ខ្លួន ពេលចប់កុងត្រាជាមួយ សាន់ដេ

តារា​ចម្រៀង​ល្បី​ឈ្មោះ​របស់​ផលិតកម្ម សាន់​ដេ លោក ខេមរៈ សិរីមន្ត គ្រោង​នឹង​បើក​ផលិតកម្ម​ផ្ទាល់​ខ្លួន​នា​ពេល​ដ៏​ខ្លី​ខាង​មុខ។ ការ​គ្រោង​បើក​ផលិតកម្ម​ចម្រៀង​ផ្ទាល់​ខ្លួននេះ​ ធ្វើ​ឡើង​​ចំពេល​​​កុងត្រាជា​មួយ​ផលិតកម្ម សាន់​ដេ នឹង​ផុត​ក្នុង​ពេល​ឆាប់ៗ។

តារា​ចម្រៀង​លោក ខេមរៈ សិរីមន្ត មិន​អាច​សុំ​ការ​បញ្ជាក់​បាន​ទេ ដោយ​ទូរសព្ទ​របស់​លោក​ មិន​អាច​ទាក់ទង​បាន។ យ៉ាង​ណា​លោក ខេមរៈ ភារុណ ត្រូវ​ជា​បងប្រុស និង​ជា​អ្នក​និពន្ធ​ល្បី​ឈ្មោះ​ម្នាក់លើក​ឡើងថា ការ​បើក​ផលិតកម្ម​ថ្មី​នេះ មិន​ទាន់​ដឹង​ច្បាស់​​យ៉ាង​ណា​ទេ ដោយ​រង់​ចាំ​ផុត​កុងត្រា​ជា​មួយ​ សាន់ដេ​ សិន។

អ្នក​និពន្ធ​រូប​នេះ​បញ្ជាក់​ថា "រឿង​ប្អូន​ប្រុស​ខ្ញុំ​គាត់​បើក​ផលិតកម្ម​ផ្ទាល់​ខ្លួន​ហ្នឹង​នៅវែងឆ្ងាយ​ទៀត ខ្ញុំ​មិន​អាច​បញ្ជាក់​ពេល​នេះ​បាន​ទេ។ អ្វីៗ​យើង​រង់​ចាំ​មើល ការ​ផុត​កុងត្រា​ជា​មួយ​ សាន់ដេ សិន"។

លោក ខេមរៈ ភារុណ បន្ត​ថា​ នេះ​​ជា​រឿង​ដ៏​ធំ និង​ស្មុគ្រស្មាញ​បំផុត​សម្រាប់​ការ​បើក​ផលិតកម្ម​។ ដូច្នេះហើយ​លោក ក៏​ដូច​ជា​ប្អូន​ប្រុស មិន​មែន​ចេះ​តែ​អាច​ធ្វើ​ឡើង​ភ្លាមៗ​បាន​នោះ​ទេ។ បន្ថែម​ពី​នេះ​លោក​បាន​អះអាង​ថា ​ដំណឹង​លេចលឺ​ថា​លោក និង​ប្អូន​ប្រុស​ត្រៀម​បើក​ផលិតកម្ម​ថ្មី ដោយ​មាន​ទំនាស់​ជា​មួយ​ម្ចាស់​ផលិតកម្ម សាន់ដេ គឺ​មិន​ពិត​ឡើយ។

អ្នក​និពន្ធ​រូប​នេះ​​ថា ត្រកូល ខេមរៈ ជា​មួយ​ផលិតកម្ម សាន់ដេ នៅ​តែ​ល្អូកល្អិន​ជា​មួយ​គ្នា​ដដែល បើ​ទោះ​ជា​កុងត្រា​ជិត​បំផុត​កំណត់​ហើយ​ក្ដី។

បើ​ទោះ​ជា​បែប​នេះ​ក្ដី​ យោង​ទៅ​តាម​ប្រភព​​អាច​​ទុក​ចិត្ត​បាន​​មួយ​បញ្ជាក់​ថា​​ត្រកូល ខេមរៈ ជា​ពិសេស​លោក ខេមរៈ សិរីមន្ត ផ្ទាល់​តែ​ម្ដង ត្រៀម​នឹង​បើក​ផលិតកម្ម ថ្មី​ក្នុង​ពេល​ឆាប់ៗ ក្រោយ​​ចប់​កុងត្រាជា​មួយ​ សាន់ដេ។ ការ​ត្រៀម​បើក​ផលិតកម្ម ផ្ទាល់​ខ្លួន​នេះ​ក៏​ព្រោះ​តែ​មួយ​រយៈ​ចុងក្រោយ​ទីផ្សារ​ចម្រៀង​របស់​លោក ហាក់​ស្ងប់ស្ងាត់ ដោយ​សាន់ដេ មិន​សូវ​ជា​ផ្ដល់ចម្រៀង​ឱ្យ រួម​នឹង​ជំហរ​ច្បាស់​លាស់​ដូច​ពេល​មុនៗ។ ប៉ុន្តែ​ដំណឹង​ទាំង​នេះ​ត្រូវ​បាន​ច្រានចោល​ដោយ​លោក ខេមរៈ សិរីមន្ត។

លោក ខេមរៈ​សិរីមន្ត រួម​នឹង​បងប្រុស និង​ប្អូន​ស្រី បាន​​ជ្រក​ក្រោម​ទ្រនំ សាន់ដេ ដោយ​គិត​មក​ទល់​នឹង​ពេល​នេះ​មាន​រយៈពេល៩ ទៅ​១០​ឆ្នាំ​ហើយ។ ក្នុង​រយៈ​ពេល​ដ៏​យូរ​នេះ​លោក​បាន​សាង​កេរ្តិ៍ឈ្មោះ​ល្បី​ខ្លាំង​ក្នុង​ពិភព​សិល្បៈ។ អ្នក​គាំទ្រ​​កំពុង​តែ​រង់ចាំ​មើល​ថា​ តើ​តារា​ចម្រៀង​រូប​នេះ មិន​បន្ត​កុងត្រាថ្មី​ជា​មួយ​ សាន់ដេ ហើយ​ឈាន​ទៅ​បើក​ផលិតកម្ម​ផ្ទាល់​ខ្លួន​មែន​នោះ អាច​នឹង​ល្បី​ឈ្មោះ​ដូច​នៅសាន់ដេ ឬ​ធ្លាក់​ចុះ​ជាង​មុន៕

Read More