មេរោគកុំព្យូទ័រ “WannaCry” តំឡើងជំនាន់ដល់ 2.0 ដែលកម្មវិធី "Kill Switch" មិនមានឥទ្ធិពលកំចាត់បានឡើយ
ដើមសប្តាហ៍នេះ បុគ្គលិកក្រុមហ៊ុនស្ទើរពាសពេញប្រទេសចិន ចូលបំពេញការងារជាមួយនិងកុំព្យូទ័រដែលមិនអាចដំណើរការបាន ដោយសារកុំព្យូទ័ររបស់ក្រុមហ៊ុនទាំងនោះបានឆ្លងមេរោគកុំព្យូទ័រ “WannaCry” បន្ទាប់ពីមេរោគនេះបានវាយលុកប្រទេសចិនកាលពីចុងសប្តាហ៍កន្លងទៅ។
គិតត្រឹមថ្ងៃចន្ទ ទី១៥ ឧសភា ឆ្នាំ ២០១៧ នេះ មានប្រទេស១៥០ហើយដែលកំពុងជួបបញ្ហាដែលបង្កដោយមេរោគនេះ ប្រទេសចិនជាប្រទេសរងគ្រោះខ្លាំងដោយមេរោគកុំព្យទ័រ “WannaCry”។ គ្រឹះស្ថានសិក្សាជាគោលដៅរងគ្រោះខ្លាំងបំផុតពីមេរោគកុំព្យូទ័រ “WannaCry” ហើយផ្នែកផ្សេងៗទៀតមានដូចជា ស្ថានីយន៍អយស្ម័យយាន , ហាងលក់ទំនិញ និងស្ថាប័នរបស់រដ្ឋមួយចំនួនទៀតក៏ត្រូវបានរងការឆ្លងនៃមេរោគកុំព្យូទ័រ “WannaCry” នេះដែរ។ ដោយឡែក អស់រយៈពេល១ថ្ងៃកន្លះទៅហើយដែលប្រព័ន្ធអ៊ិនធឺណេតត្រូវបានបង្កកមិនដំណើរនៅតាមបណ្តាស្ថានីយន៍ប្រេងឥន្ទនៈ PetroChina ដែលធ្វើអោយអតិថិជនមិនអាចបង់ថ្លៃប្រេងឥន្ទនៈតាមរយៈកាតធនាគារនិងទូរសព្ទដៃបាន។ បច្ចុប្បន្ននេះ ៨០ភាគរយនៃស្ថានីយន៍ប្រេងឥន្ទនៈទាំងនោះបានដំណើរធម្មតាវិញហើយ។
ឆ្លើយតបនិងការវាយលុករបស់មេរោគកុំព្យូទ័រ “WannaCry” មជ្ឈមណ្ឌលប្រឆាំងនិងមេរោគកុំព្យូទ័ររបស់ចិន បានជំរុញអោយអ្នកប្រើប្រាស់កុំព្យួទ័រដំណើរដោយ Windows ដំឡើងកម្មវិធីការពារសុវត្ថិភាព ក្នុងន័យជៀសវាងការឆ្លងកាន់តែច្រើន។ អ្នកជំនាញផ្នែកប្រព័ន្ធសុវត្ថិភាពកុំព្យូទ័របានបង្កើតកម្មវិធី "Kill Switch" ដើម្បីទប់ស្កាត់មេរោគកុំព្យូទ័រ “WannaCry” កុំអោយឆ្លងរាតត្បាតបន្តទៀត ប៉ុន្តែកម្មវិធី "Kill Switch" មិនបានដោះស្រាយបញ្ហាទាំងស្រុងបានទេ ដោយក្រុម Hackers បានធ្វើការដំឡើងជំនាន់មេរោគកុំព្យូទ័រ “WannaCry” ដល់ 2.0 ដែលកម្មវិធី "Kill Switch" មិនមានឥទ្ធិពលកំចាត់បានឡើយ។
ក្រុមហ៊ុន Microsoft ក៏បានដាក់ចេញនូវកំណែកម្មវិធីសំរាប់ Windows XP ផងដែរ ក្នុងន័យទប់ស្កាត់នៃការឆ្លងមេរោគកុំព្យូទ័រ “WannaCry” នេះ។
មេរោគកុំព្យូទ័រ “WannaCry” នេះតម្រូវអោយអ្នកប្រើប្រាស់កុំព្យូទ័របង់ប្រាក់ដើម្បីទទួលបានសិទ្ធិគ្រប់គ្រងកុំព្យូទ័ររបស់ខ្លួនឡើងវិញ។ អ្នកជំនាញបានផ្តល់យោបល់កុំអោយបង់ប្រាក់ទៅអោយមេរោគកុំព្យូទ័រនេះ ព្រោះថាមិនមែនគ្រប់ការបង់ប្រាក់របស់ម្ចាស់កុំព្យូទ័រ អាចដោះស្រាយបញ្ហាបានទេ តែផ្ទុយទៅវិញការបង់ប្រាក់នេះ នឹងបង្កជាបញ្ហាមួយដំណាក់កាលទៀត ដែលក្រុម Hackers នៅតែបន្តគំរាមកំហែងទារប្រាក់ពីម្ចាស់កុំព្យូទ័រ៕
ប្រែសម្រួល៖ sinkeo
ផ្តល់សិទ្ធិផ្សាយដោយ៖ CCTV+
0 comments:
Post a Comment